Бичлэгийн тоо 33
Э.Халиунболд Азийн аварга боллоо Ираны Тегеран хотноо бартаат замын мотоциклийн Азийн аварга шалгаруулах III шатны уралдаан боллоо. 125 см3 ангилалд 12 орны 21 мотоциклчин хоёр гараанд уралдахад Монголын Э.Халиунболд хол тасархай түрүүлж, Азийн аварга цол хүртэв. Тэрбээр Иранаас ОХУ-ын Ангарскт өчигдөр хүрэлцэн ирж олон улсын тэмцээнд хурд сорьсон аж. Азийн анхны аварга Э.Халиунболдыг түүний аав, нэрт мотоциклч Ш.Эрдэнэбилэг, ОУХМ Д.Очирсүх нар дасгалжуулдаг юм. P.S: Э.Халиунболд Ангарскийн уралдаанд ангилалдаа V байр эзэлжээ. Эмэгтэй бөхчүүд хос мөнгөтэй Азербайжаны нийслэл Бакуд FILA-гийн “Алтан гранпри” тэмцээний финал явагдаж байна. Өмнөх хоёр шатны шилдэг найман бөх урилгаар оролцож буй уг тэмцээний эмэгтэйчүүдийн ангилалд манай ОУХМ Б.Одончимэг (63 кг), О.Бурмаа (72 кг) нар мөнгөн медаль хүртжээ. 63 кг-д зургаан бөх хүч сорьсон бөгөөд Б.Одончимэг эхний тойрогт гоц мөргөв. Улмаар Украины Г.Василенког гурван үед (5:2, 0:1, 3:2) оноогоор ялж, ОХУ-ын Л.Волосовад гурван үед (1:0, 0:3, 0:3) ялагдсан байна. 72 кг-д таван бөх зодоглосон тул тойргоор барилдуулжээ. О.Бурмаа ОХУ-ын А.Стародубцеваг эхний үед цэвэр, Азербайжаны Д.Ивановаг хоёр үед 1:0, 2:0 оноогоор ялж, дэлхийн хошой аварга Болгарын С.Златевад 0:1, 0:1, Азербайжаны З.Гурбанхажиевад гурван үед 0:1, 1:0, 1:1 оноогоор дийлдөн мөнгөн медаль хүртлээ. Тэмцээний дүнг PDF 4-р нүүрээс үзнэ үү. Залуу бөхчүүд Катарыг зорив Долдугаар сарын 4-6-нд Катарт Азийн залуучуудын аварга шалгаруулах чөлөөт бөхийн тэмцээн болох гэж байна. Үндэсний шигшээ багийн дасгалжуулагч, гавьяат тамирчин Ц.Цогтбаяр (“Алдар” спорт хороо), спортын мастер Ц.Баярсайхан (Дархан) нарын удирдлага дор манай залуу бөхчүүд өчигдөр Персийн буланг зорилоо. Багийн бүрэлдэхүүнийг танилцуулвал: Эрэгтэй. 50 кг-Б.Батсүх (Дархан), 55 кг-Д.Цогтбаатар (Алдар), 60 кг-Э.Эрдэнэбаяр, 66 кг-П.Өнөрбат, 74 кг-М.Батмөнх, 84 кг-Н.Цэрэнчунт (бүгд Дархан), 96-кг Г.Ганням (Тэмүүжин) Эмэгтэй. 44 кг-Э.Нарангэрэл, 48 кг-Б.Даваасүрэн (хоёул “Хангарьд”), 51 кг-Д.Отгонцэцэг (Дархан), 55 кг-Э.Цэвэгмэд (Алдар), 59 кг-С.Батцэцэг (Замчин), 63 кг-Б.Баярзаяа (Дархан), 67 кг-О.Насанбурмаа (Женко), 72 кг-Д.Мөнхтуяа (Алдар). Б.Урантунгалаг олимпийн эрхэнд ойртсон ч... “Бээжин-2008” олимпийн эрх олгох байт харвааны тэмцээн Францын Бое хотноо энэ сарын 26-28-нд болж өндөрлөлөө. Тэмцээнд эмэгтэй 48, эрэгтэй 73 тамирчин онч сорив. 70 метрээс хоёр удаа харвах харваанд эмэгтэйчүүдээс ОУХМ Б.Урантунгалаг 626 оноогоор хоёрдугаар байр эзлэв. Түүний өмнө Испанийн Битрис Габреро 630 оноогоор тэргүүлсэн юм. Б.Урантунгалаг цаашдын харваанд Молдавын Екатерина Бюлигаг 99:93, Ираны Хейдари Хоуматыг 102:96-гаар ялж, шилдэг наймд шалгарсан. Олимпийн эрхийн төлөө тэрбээр Киприйн Елена Мосиковтой таарч 102:98-аар ялагдав. Хэрэв түүнийг ялсан бол манай тамирчин олимпийн эрх авах байлаа. Тус тэмцээнд ОУХМ Ж.Гантөгс 70 метрээс хоёр удаа харвах харваанд 640 оноогоор есдүгээр байрт оров. Улмаар тэрбээр Алжирын Боуслах Мондхирийг 103:101, Ирландын Кейд Хэнлоныг 105:102-оор ялсан ч Казахстаны Артем Ганкинд 102:98-аар дийлдсэнээр XII байр эзэлжээ. Боксчид Европоос ганзага дүүрэн ирлээ Боксын шигшээ багийн тамирчид Европт болсон олон улсын тэмцээнүүдэд хүч сориод эх орондоо ирлээ. Эхлээд Чехт болсон уламжлалт тэмцээнд манай дөрвөн тамирчин (Л.Зоригтбаатар 54 кг, Д.Отгондалай 60 кг, Л.Шинэтулга 64 кг, М.Нандин-Эрдэнэ 69 кг) нар дасгалжуулагч Б.Батсүрэн, шүүгч Ц.Нандигжав нарын хамт оролцжээ. Кубын I шигшээ оролцсон тус тэмцээнээс М.Нандин-Эрдэнэ хүрэл медаль хүртсэн байна. Харин дараа нь Германы “Химийн цом” тэмцээнд дээрх бүрэлдэхүүнээр хүч сориход Д.Отгондалай мөнгө, Л.Зоригтбаатар, Л.Шинэтулга нар хүрэл медаль хүртжээ. Энэ үед манай зарим тамирчин Улаан-Үдэд болсон тэмцээнд хүч сорьж, гурван алт, дөрвөн мөнгө, хоёр хүрэл медаль хүртлээ. Эрэгтэй зургаа, эмэгтэй таван боксчин тус тэмцээнд оролцсон ба эрчүүдээс Б.Түвшинбат алт, Э.Идэрхүү, Т.Чулуунтөмөр мөнгө, Н.Шинэбаяр, А.Бат-Очир хүрэл хүртсэн бол эмэгтэйчүүдээс М.Нандинцэцэг, Ц.Цэрэнчимэг алт, Т.Болортуяа, М.Гүндэгмаа мөнгө, О.Сувд-Эрдэнэ хүрэл медаль авсан сайхан амжилт үзүүлжээ. Шигшээ багийн тамирчид өдгөө Эрдэнэтэд олимпийн үндсэн бэлтгэлээ базааж байгаа бөгөөд долдугаар сарын 6-нд хотод ирэх аж. Харин эрх авсан дөрвөн тамирчин долдугаар сарын 8-14-нд Украинд болох олон улсын тэмцээнд оролцох юм. Гэвч зардал мөнгөнөөс шалтгаалаад манай шүүгчид Украин руу явж чадахгүйд хүрчээ. Түүнчлэн долдугаар сарын 24-27-нд Улаанбаатар хотноо болох МОБХ-ны 60 жилийн ойн нэрэмжит олон улсын тэмцээнд хүч сорьсноор олимпийн бэлтгэл үндсэндээ хангагдах аж. |